Mar 6 | MHL | STEP | Aria Yeesus ona teeria unowiya owowa nain piipuap ona owowa ikiwok.

Mark 6

Wi Nasaret-ke Yeesus firekamik

(Matiu 13.53-58, Luk 4.16-30)

1 Aria Yeesus ona teeria unowiya owowa nain piipuap ona owowa ikiwok. 2 Ne ona owowa-pa ikok Sabat naeya lotu koora ikiwemik. Koor kemena-pa nan Mua Maneka opora suule wia onak. Ne wi opora wiar miimap soranep wi-wieniw aakunemik, “Opora fain kaaneke aawok? Ne amis maneka nain naareke iwok? Ne kamenap onap kekanowa onaiya ikok maa miililina oniya? 3 I amisaremik, o koora kuow mua-ke. O Maria muuka-ke, ne ona wiamun unowa, Yems, Yoses, Yuudas ne Saimon, wi nanemik. Ona wekera owowa fan-pariw ikemik.” Naap maemi miatinep opora me wiar miimamik.

4 Ne Yeesus-ke wia maakek, “Sira naap ikua, wi owow oko oko mua-ke profet ekima opimik. Ne ona owow onoma-ke ne ona kaka-ke, ona weepe, ona wiamun-ke weetak,” naap maek. 5 Owowa nan ikua nain maa miililina me onak. Wi napum mua papako muutiw wia saliwak. 6 Wi owowa nain emina kekanep opora me wiar miimamik nain manek akena kema wia suuwak. Ne nan owowa papako ikiwep Mua Maneka opora wia maakem-miek.

Yeesus ona teeria uuwowa wia sesekak

(Matiu 10.5-15, Luk 9.1-6)

7 Aria iir oko-pa Yeesus ona teeria ten kuisow erup nain wia fareya ekapiwkin uuwowa wiemi mua erup-erup wia sesekak. Wia sesekami sawur wia iirarowa kekanowa wiek. 8 Ne wia maakek, “Ni ikiwemi wapena oram akena ikiweka. Raapa, maa enowa ne maamuma me aaweka. Oram soomarow kuuma muutiw opap ikiweka. 9 Meren suuwowa suuweka ne mia suuwowa erup me suuweka, kuisow muuta. 10 Ikiwemi owowa kain kereriwkin mua-ko nia aawiwkin-na, neeke wiar inem-ikeka. Ne mauwowa welawap owowa nain piipuap owow oko ikiweka. 11 Ne owow oko nain me nia aawiwkin-na, ne opora me nia miimiwkin-na owowa nain piipuami sira wia ofakowowa epak kepur foma tukunep-puap ikiweka.” ^{▼▼6.11Meren foma tukuniwkin wi kema aawep maikuan, “I sira eliwa me onamik.”}

12 Yeesus teeria mua ten kuisow erup nain wiam ere-erup aremi ikiwemik. Owow unowa nain ikiwep wia maakem-miemik, “Ni kema kirep sira samo-samora piipueka akena,” nain wia maakemik. 13 Ne sawur wia anirawap ikemik nain pun wiar iirarem-ikemik. Ne wi napum mua wel mia-pa wiar ifiwkin sariarem-ikemik.

Yon Baptais ifakimiwkin umok

(Matiu 14.1-12, Luk 3.19-20 ne 9.7-9)

14 Aria Yeesus meta wiar manekareya wi emeria mua opora ononer maemik. Papako-ke maemik, “O Yon Baptais-ke. Iiriw umok nain nainiw iikirak. Naapeya kekanow onaiya ikok maa miililina onam-ikaiya.” Ne papako-ke maemik, “O Elaiya-ke. Iiriw Mua Maneka-ke aawep iinan purupok nain aakisa nainiw sesekeya orok.” Ne papako-ke maemik, “O profet oko-ke, wi iiriw eker profet saarik.” Ne Erot-ke Yeesus meta wiar miimap maek, “Os-na Yon Baptais-ke. Yo iiriw yena ami mua wia maakemkun o imakuna puukiwkin umok nain. O umok nain aakisa kiiriw iikirak.” 17 Opora maek nain onoma feenap. Erot sira samora onak, weepe Filip emeria wiar aawok. Emeria nain unuma Erodias. Ne Yon Baptais-ke ikiwep amukaremi maakem-ikua, “No neepe emeria wiar aawon nain sira puukan.” Muut nain Erot-ke ami mua wia sesekeya Yon opap koora-pa wuamik. Ne Erodias pun kema bagiwirap o ifakimowa maek. Nain Erot-ke koora-pa wuap baliwep urufam-ikua. 20 Moram o amisarek, Yon mua sira eliwa ne Mua Maneka-ke sesekak. O Yon opora wiar miimowa kookalem-ikua, nain kema erup arem-ikua.

21 Ne Erodias Yon ifakimowa nain era akupam-ikua. Ne iir oko Erot ona onak muukarek nain fofa wiar kerereya, nain kema suuwowa naep enow maneka onak. Ne Galili kame anim onoma ne wi ami mua mane-maneka ne owow saria unowa wia fariwkin koora wiar ekapep maa enemik. 22 Maa enem-ikaiwkin Erodias wiipa-ke ekapep wia ufomak. Ne Erot ne wi nan ikemik nain urufap manek akena kemelamik. Ne Erot-ke wiipa nain maakek, “No maa mauwa kookalin? Maa maeya nena kookalowa-pa niinen. 23 Yo maken akena nefa maakiyem, no maa mauwa efa maakinan-na yo eliw niinen. Maa unowa ne miiwa okaiwi naeya-na eliw fookap okaiwi niinen.”

24 Naeya wiipa-ke onak nokarek, “Aite, yo maa mauwa maemkun yiinok?” Ne onak-ke maakek, “Naap maake, ‘Yon Baptais imakuna puukap ikiwosa yee.’” 25 Naap maakeya ewur akena kirep Erot maakek, “Ikoka kuisow, Yon Baptais imakuna puukap ikiwosa epira-pa wuap pekapep yee.”

26 Naap maakeya Erot kema samorarek, o Yon ifakimowa miatinek. Nain ona tapu mokoka-pa opora maken akena wiipa nain maakek. Naapeya opora opominen naep eliw naakek. Ne ami mua oko sesekami maakek, “Ewur akena ikiwep Yon imakuna puukap ikiwosa pekapoma.” Naeya o ikiwep Yon imakuna puukap ikiwosa epira-pa wuap pekapep wiipa nain iwok. Ne wiipa-ke pikip onak iwok. 29 Aakisa fan Yon teeria meta miimap ekapep sawi napuma aawep pikip nomon ona-pa wuamik.

Yeesus mua tausen ikur enowa wienakek

(Matiu 14.13-21, Luk 9.10-17, Yon 6.1-13)

30 Aria Yeesus ona teeria wiam erup-erup owow unowa ikiwemik nain kiiriw kirep ekapemik. Ekapemi Yeesus wiar fiirimep wiena uuwamik nain maakemi opora wia maakem-miemik nain pun maakemik. 31 Wi fiirimep ikaiwkin emeria mua unowa wia urufu naep ikip ekapep naem-ikemik. Naap onam-ikaiwkin wi maa enowa me pepek. Naapeya Yeesus-ke ona teeria wia maakek, “Arika, i epa oko mua marewa-pa neeke ikiwep lawisik uurarikua.”

32 Ne wi oromi aasa suuwap epa mua marew nain ikiwemik. Ne wi owow unowa nain wia urufap amisaremik. Ne wis pun karuwiw ikiwep wi kiikir fuunep ikaiwkin Yeesus ona teeria onaiya ikiwep fuunemik. 34 Yeesus ame fuunep aasa-pa orop ekak-na emeria mua unowa wi kiikir ekapep ikemik nain wia urufap wia kemalek. Moram wi sipsip saarik, wia urufow mua mareweya momor maneka ikemik. Naapeya Mua Maneka opora wia maakem-ikua.

35 Wia maakem-ikaeya ikip urerarek, ne ona teeria-ke ekap maakemik, “Sa, ama orok ya, ne epa fain enowa marew. 36 Naapeya wia sesekeya ikip owowa-pa maa enowa-ko wiar sesenaruk.” 37 Ne wia maakek, “Nis-ke maa enowa-ko wienakeka.” Ne maemik, “Sa, maamuma maneka-pa maa enowa aawowa saarik. I maamuma andet erup naap wafurap enowa sesenarep wienakiyen-i? Me pepek.” 38 Ne wia nokarek, “Ni maa enowa kamin niar ikua? Ikip urufeka.” Ne wi ikip urufap maakemik, “Emer ikowa ikur ne mera erup yiar ikua.” 39 Ne wia maakek, “Wia maakiwkin wiam aawep teeria teeria pokuk.”

40 Naeya wi teeria-pa pokamik, papako mua ten ikur naap wiam aawep pokamik, ne papako mua andet kui-kuisow naap wiam aawep pokamik. 41 Ne Yeesus-ke emer ikowa ikur ne mera erup nain aawep iinan mokakemi Mua Maneka sira eliwa naakep-puap emera wu-wuepap ona teeria wieya wienakemik. Ne mera erup nain pun naap onap sererkap wieya wienakemik. 42 Wi maa enep pepek eramik, 43 ne emer ikowa ne mera enakiwa kiromakeya fiirimep inera-pa iparemik. Nain inera ten kuisow erup taanek. 44 Emeria mua unowa nain enep iiwawun pepek eramik. Ne mua muutiw wia tuunamik, nain tausen ikur naap.

Yeesus eka iinan-pa soomarek

(Matiu 14.22-23, Yon 6.16-21)

45 Aria ewur akena Yeesus ona teeria wia sesekeya orop aasa suuwap miimep eka kame okaiwi Betsaida ikiwemik. Wi ikiwiwkin yakeyak maneka nain wiena owowa wia sesekeya ikiwomakemik. 46 Ikiwiwkin o Mua Maneka kema suuwekam naep ema urupok.

47 Ne urer akena oromi saa-pa iimarep ona teeria aasa onaiya eka gone-pa ikaiwkin wia urufak. 48 Wi okaiwi ekowa nain ewar maneka-ke wia fienam-ikua. Naap ikok epa wiiwim naap o eka iinan-pa soomar-ikiwep wiar fuunek. 49 Ne wia nomakekam naep onam-ikaeya o urufap sawur-ke naep kema tootonep samor akena kiriremik. Ne os-ke wia maakek, “Ni kekaneka. Aa yos-ke. Ni me keker opaka.”

51 Naap wia maakemi aasa ireya ewar puok. Ne wi samor akena soranep opaimika tenemik. 52 Yeesus eena maa enowa wienakek nain urufamik, nain o kekanowa me kema suuwamik. Iiwawun kema irinaremik.

Yeesus Genesaret kame-pa napum mua emeria unowa wia saliwak

(Matiu 14.34-36)

53 Aria wi ekap Genesaret kame kererep aasa pona-pa kaikamik. 54 Wi aasa piipuap urupemik-na wi owow mua Yeesus urufap amisaremik. 55 O urufap kirep karuwiw ikiwep wiena owowa napum mua unowa esimsa-pa wia wuap Yeesus ikua nan pikiwemik. 56 O ikiwemi owowa wiar kererem-ikaeya wi napum mua unowa epa maneka-pa wia wuam-ikemik. Ne wi napum mua Yeesus urufap maakem-ikemik, “Emawa, nena mia suuwowa miirfa nefar opap sariariyen aa.” Ne mia suuwowa wiar opamik nain sariaremik.